Samherjar tóku þátt í Smábæjaleikunum um liðna helgi, sem er skemmtilegt fótboltamót fyrir krakka og er haldið á Blönduósi. Við vorum með lið bæði í 6. og 7. flokki og stóðu bæði liðin sig frábærlega undir stjórn þjálfarans okkar, Orra Sigurjónssonar.
Að loknu móti fengu allir verðlaunapening og þátttökubikar, auk þess sem 6. flokkur vann sinn riðil á mótinu og var að lokum í 2. sæti í sinni deild, af um 17 liðum. Það telst virkilega góður árangur og við erum mjög stolt af öllum keppendunum okkar.
Á laugardeginum var svo gert hlé á mótinu og horft á fyrsta HM-leik Íslands gegn Argentínu í félagsheimilinu á Blönduósi. Skemmst er frá því að segja að stemningin var gríðarleg!
Við þökkum öllum keppendum, foreldrum, þjálfaranum okkar, mótsstjórn, öðrum keppnisliðum og öllum sem komu að mótshaldinu kærlega fyrir góða helgi.
